Ragam Parangai Urang Bajua Bali

Jua bali, galeh manggaleh alah manjadi hal nan paling umum dikarajoan dek manusia. Utamo sakali kito sabagai urang Minang. Ndak paralalu dijalehan bana, dima bumi dipijak disitu galeh dihoyak.

Bahubuangan, sabanyak kapalo urang. Sabanyak itu lo tingkah parangai urang ko. Kok rambuik iyo samo itam (urang bule jan dietong ndak) Namun pamikiran ba beda beda. Nan ciek mode iko, nan ciek lai takah itu. Biaso sen tu nyo.

Tamasuak dalam dunia galeh manggaleh ko. Baragam parangai urang, nah baragam pulo tingkah urang dalam galeh manggaleh. Ndak nan manjua, kadang nan mambali.

Apapun parangai tu, yo kadang masih bisa dimaklumi. Namo nyo se manusia. Tapi, nan kini ko awak caliak, ado macam macam parangai urang nan manjajok dicaliak katiko bajua bali. A kiro kiro tu? Iko nyo ha,

#Bali Bakwan Ciek, Bakwan Urang Kadai Barosok sadonyo

Iko iyo agak baa kadang wak mancaliak urang nan takah iko. Gali gaman kadang wak mancaliak. Tapi kalau tamasuak sanak dalam golongan urang urang nan takah iko, kurang-kurangilah. Ndak elok parangai takah iko.

Babali bakwan ciek, eh barosok sadonyo. Bacari nan gambua, nan gadang. Iyo batua, awak nan mambali buliah mamiliah, tapi tenggang lo barang urang nan karusak. Ndak ibo wak urang nan mambali sudah awak. Lah bakeh bakeh tangan awak tu. Bayangan kalau awak di posisi urang tu. Labiah parahnyo, tangan awak antah sudah manga manga bagai. Kalau secara kesehatannyo, ndak higienis lai.

#Mamakuak urang Mambali, Maagiah harago tinggi bana

Nan ciek ko mungkin baa lo lah mangatoannyo. Untuak nan manjua, batua bana maambiak untuang ndak do batehnyo atau takaran nan ma atur. Tapi, nan kok dapek jan lah di hagoan bana barang ko tinggi tinggi bana. Apo lai kalau manggaleh di kampuang atau daerah Minangkabau juo.

Ambiakla untuang yo awak mandapek, urang mambali ndak tabali maha. Sabab, ano kan urang awak juo du nan mambali. Awak baruntuang, urang sanang.

Labiah parah nyo bahago an barang tinggi. Kadang urang nan ka mambali alah tau kisaran harago, tagigik lidah lo ka mahago baliak. Dampaknyo jangko panjang ka awak juo, beko lah terkenal kadai wak pamaha tu maleh urang balanjo tampek wak lai.

#Nan ka Mambali Ciek, Ba Ondoh Poroh Ka dalam Kadai

Nan macam ko banyak bagi sanak kito nan manggaleh mangaluah. Misalnyo manggaleh Sarawa lepis, kawan nan ka mambali ciek. Pai agak basapuluah ka kadai. Kadai urang jadi sampik, kan ibo lo wak urang manggaleh.

Alun lo lai nan kawan ko banyak lo nan nyo kaca. Bakacau kadai urang ka sadonyo. Sabisa mungkin nan acok pai balanjo mode ko, yo jan lah diulang lai. Bao kawan buliah, bao lah kawan agak baduo paliang banyak. Misalnyo mintak pandapek tantang apo nan ka wak bali tu. Tapi pengecualian kalau pai balanjo ka Ramayana atau Matoari, kok ka sinan tasarah lah, sabab matoari ko lai gadangnyo.

#Nyinyia, Batanyo harago barang di kadai Sadonyo, Mambali Indak

Nan iko ciek lai. Nampak iko batanyo haragonyo, nan iko batanyo pulo. Eh ujuang-ujuangnyo mambali indak

Tau ndak, kok lah pai sanak. Maupek urang kadai nan sanak tinggaan tu mah. Kadang io baso basi maimbau urang ko, a cari ni , a cari da singgalah, caliak lah. Tapi sarancaknyo kan awak lah marancanaan apo nan ka dibali ko. O, Den kabali baju kauih, yo tanyo lah merk apo, warnanyo apo. Jan pai bali baju kauih, ka toko. Batanyo harago sawa lepis bagai, batanyo harago jeket bagai. Ujuang-ujuang nyo urang kadai malapeh hao sen.

#Mambaliak an Barang nan Alah di Bali, Mintak Pitih Liak, Mangareh Ngareh Lo

Iko mungkin agak jarang adonyo. Tapi, pasti akan ado dialami dek urang mangaleh. Nah, bagi awak nan mambali janlah sampai tajadi hal nan macam iko. Tukang PHP awak namonyo, kicek kicek lado-lado katiak kini.

Pengecualian kalau sanak mambali tarompa, dapek suok kaduonyo atau kida kaduonyo. Atau Nomor tarompa atau sipatu babeda antaro suok jo kida. Kalau kasus mode tu, yo ndak baa tu doh. Ko kan indak, lah babali. Di bao pulang, e tibo dirumah pangana batuka.

Atau misalnyo kalau mambali baju atau sapatu untuak anak. Anak ndak babao, bajaleh-jaleh jo urang kadai sabalum jua bali. “ Kok ta sampik bisa dituka ni”. Mode ko lai lama jo lah saketek.

#Awak Urang Minang, Makan Di Rumah Makan Padang, Pakai Baso Indonesia Logat Minang Loh

Antahlah yo, buruak atau indaknyo. Tapi kan kok mantun bana. Apo salahnyo pakai baso Minang se lah. Kok ndak awak manduniakan bahaso ko sia lo lai, Urang Parancih, Urang Inggirih?

Parahnyo pakai bahasa Indonesia ke Minang-an pula logatnya. Contohnya " Tambah Kering Satu Pak". Digalak-an nyo wak dek urang kadai nasi tu kalau lah pai mah. Alun lo kok ado nan mandanga di situ urang awak lo. Kan jadi bahan tertawaan kita itu, berdosa orang gara-gara kita. Di sinilah makanya kalau pribadi aku menilainya tidak baik seperti ini.

Samantaro itu dulu parangai parangai buruak dalam bajua bali. Atau ado sanak nan nio manambahan, bisalah bakomentar bagai agak sapatah duo patah kato. Buliah dari kito, untuak kito, antaro kito – bisa samo samo maintropeksi dirikan.Ndak lain tujuannyo kan membentuk kepribadian Minang nan berbudaya, berbudi pekerti luhur dan menjaga ke aman di pasar-pasar Minangkabau.