Sanak ambo dima sajo barado nan bisa mambaco tulisanko. Adolah dari pituah Angku Yus Datuak Parpatiah nan ambo danga. Mungkin dek kaset lah sarik basuo. Mako dari itu, dari ambo nan mandanga, tibo sarato ide untuak manulih-an nan tadangan tu.
Topik nan kadang mungkin bisa digalak-an. Tapi samantang baitu, itu paralu bana di kito untuak tau. Khususnyo nan calon mamak mamak, panjago warih, pambimbiang kanakan jo pamangku anak. Barang nan ka disampai-kan ko tantang mancari urang rumah atau tasabuik pulo jo induak bareh.
Hakikaik jodoh nan ado konon iyo dari nan kuaso. Tuhan nan satu, indak ado duonyo. Namun dibaliak itu, tantu nan di awak harus ba usaho. Ndak bausaho iyo agak payah ka mandapek an hasil. Sadangkan ka lalok se harus piciang mato. Antah ko indak?
Manuruik Angku Yus Datuak Parpatiah, dalam kaset nan ambo danga. Ado 6 wajah padusi di Minangkabau nan patuik ka di ambiak ka jadi amak paja. Apo se tu kiro-kiro?
- Rancak Rupo nyo - Atau kok di masyarakaik bisa dikatoan kamek paja ko.
- Mamiliah bansonyo - Aratinyo jaleh dari ma banso turun tamurun nan gadih ko
- Banyak haratonyo - Dalam katurunannyo yo lai lah urang barado paja ko.
- Tinggi Sakolanyo- Ko dapek urang nan bapandidikan. Sahubuangan kini, alah takah iko pandangaran, jo urang ndak sakola juo nan bacari? Bukan mahino sanak nan mungkin dulu pernah ndak bisa (bukan ndak nio) tapi kalau jaman kini iyo bantuak nyo pandidikan ko paralu
- Haluih budi bahasonyo - tantu padusi nan rancak parangai, elok nan kalua dimuncuangnyo. Itu nan ka mambuaek awak sanang mamakai urang sanang mancaliak.
- Taat ba agamo - Pandampiang iduik nan ka dipatangguang jawab-an di awak sabagai imam di dunia akhiraik. Tantu nan alah punyo pondasi agamo akan labiah mudah untuak di imami. Di bandiang, padusi, mangaji ndak pandai, sumbayang ndak ajan. Duo kali lipek karajo beko sanak.
Rancak rupo ndak baiman, itu pangka cilako dalam kampuang, manggata dalam nagari. Buliah di banso, indak congkak, takabua dalam nagari, urang jajok sabalik kampuang
Itulah wajah padusi minangkabau nan harus dan kalau bisa ka dijadian induak bareh. Untuak nan calon amai amai nan mambaco, nak banyak lo laki laki nan antri supayo bisa pulo mamiliah - ayo sabisa mungkin banyak-an mancukuik-an syaraik nan 6 di ateh.
You must be logged in to post a comment.